සූනියම් යනු ශුන්‍ය කිරීම හෙවත් නැති භංග කිරීමයි. මෙය සූනියම් කිරීම හා සූනියම් කැපීම යන අර්ථ දෙකකින් ව්‍යවහාර වෙයි. පහතරට ප්‍රදේශයන්හි පවත්නා ප්‍රධාන යකුන් තොවිල් අතර ගෞරව පූර්වක වීශේෂත්වයක් දක්නට ඇති ශාන්ති කර්මයකි. සූනියම් යාගය.

සූනියම් යාගයේ උත්පත්ති කතාවට මූලික වූයේ මහා සම්මත රාජ පරම්පරාව තුළ සිදු වූ පොරොන්දු කඩ කිරීමක අනිසි ප්‍රතිඵලයකි. වසවතු හා විෂ්ණු යන මිත්‍රයින් අතර ඇති කරගත් සම්මුතියක් හා පොරොන්දුවක් අනුව විෂ්ණු වසවතුගේ නැඟණිය සමගත්, වසවතු විෂ්ණුගේ නැේණිය සමගත් විවාහ වන බවට ගිවිස ගනිති. කල්යාමේදී විෂ්ණුගේ නැේණිය වූ මැණික්පාල මහා සම්මත හා විවාහ වීම නිසා ඉහත කී පොරොන්දුව කඩ වීමෙන් උපන් ඊර්ෂ්‍යාව, ද්වේශය හා වෛරය අවසානයේ පළිගැනීමක් බවට පත්විය. ඒ අනුව මැණික්පාල බිසවට නින්දා කොට ඇයගෙන් පළිගැනීමේ අදහසින් රාජ මාලිගයට ගිය වසවතු විසින් කරන ලද අණවිනය විශාල රෝ දුකකට හේතු පාදක වූ බව පෙනේ.

වඩිග බමුණා සබයට ප්‍රවේශ වන නැටුම් පදය ඉතාමත් ආකර්ශණිය ස්වභාවයක් උසුලයි. හිසේ තලප්පාවක් බැඳ, හිස මුදුනෙහි කොණ්ඩයක් බැඳ, මුහුණ පුරා පැතිරුණ රැවුලක් ද, ඇසට කළු කණ්නාඩි කුට්ටමක් ද, මාල, වළලු හා පුන නූලකින්ද සැරසී සිටී. මොහුගේ ආභරණ අතර නූපුරද ඇත. ඔහු එක් අතක පොතක් හා අනෙක් අතෙහි කුඩයක් ද දරමින් එයි. බමුණා ස්වල්ප වේලාවක් නැටූ පසු එක් ඇදුරෙක් ඉදිරියට ඇවිත් ඔහුගෙන් ප්‍රශ්න අසන්නට ගනී. ඉන්දියාවෙන් එන මේ බ්‍රාහ්මණයා සිංහල නොදනී. ඔහු ව්‍යාජ පාලි බසකින් කතා කරයි. ඔහු කියන දේ ඇදුරාට තේරුම් ගැනීමට නොහැකි වීම හා ඇදුරා කියන දේ ඔහුට තේරුම් ගත නොකැකි වීම හේතුකොට ගෙන හාස්‍ය රසය හා නාට්‍යමය ගුණය මතුවේ.

බමුණා : (අත දිගු කොට දක්වමින්) දේව මනුස්සානං අත්ථා. බහු මනුස්සානං අත්ථා. මණ්ඩප අත්ථි, ආලෝකං අත්ථී කිං කාරණං අත්ථී.