දෙවොල් දෙවියන් ලංකාවට ගොඩ බැසීමේ සිද්ධිය නිරූපණය කරන මෙම අවස්ථාව ඉතා සිත් ගන්නා සුළුය. කඩවත් අල්ලා දෙවොල් දෙවියන්ට ගොඩ බැසීමට ඉඩ නොදෙන අතර ශ්‍රී ලංකාදීපයට අරක් ගත් දෙවිදේවතාවුන් වහන්සේලාගේ අවසරය රැගෙන ආවොත් පමණක් අවසර දෙන බැව් කියවේ. මේ අවස්ථාව නිරූපණය කරනමෙම සිද්ධියේ දී ප්‍රාණවත් මුඛරි සංවාද භාවිතා කිරීම සුවිශේෂ කරුණකි.

* ඇත් බණ්ධනය හා මී බන්ධනය

සබරගමු පළාතේ පවත්වනු ලබන කිරි මඬු සහ පහන් මඬු යාග තුළ ඇත් බන්ධනය සහ මී බන්ධනය යන නාට්‍යමය ලක්ෂණවලින් යුක්ත අංග දක්නට ලැබේ. මෙම පෙළපාලි දඩයමට අධිපති දෙවියකු වන මංගර දෙවියන් උදෙසා පවත්වනු ලබන්නකි.

ඇත් බන්ධනයෙන් නිරූපිත වන්නේ ඇතෙකු අල්ලා ඇතාගේ දළ කපා මංගර දෙවියන්ට පුදනු ලබන අයුරුය. ඇත් බන්ධනය ආරම්භ වන්නේ ප්‍රධාන කපුරාළ හා බෙර වයන්නෙකු අතර කෙරෙන සංවාදයකිනි.

"දැන් ඉතින් ඇතෙක් අල්ලා දොළහ දෙයියන්ට පුද කරන්න කාල වේලාව පැමිණ තියෙනවා නේද?" ඔහු අසයි. ඉක්බිතිව ඔහු හා තවත් කපුරාල කෙනෙකුත් කවි කියමින් බෙර පදයට අනුව නටමින් යාග මඬලෙහි වටේට යති.

කපුරාල : ගුරුන්නාන්සේ ඔන්න ඇතෙක්, මම මේ කොට්ටෝරුවන් එක්ක යන කොට, කකා, බිබී, රිරී, නනා යනකොට අපි වලවේ ගඟට ආවා. එතකොට මේකා මාව නවත්තලා කියනවා, අන්න බල ඇතෙක් කියලා. මම ඇසුවා කොහෙද කියලා. මේකා කියනවා ඒදණ්ඩ උඩ ඉන්නවයි කියලා. හැබෑවටම ගුරුන්නාන්සේ බලනකොට ඇතෙක් ඉන්නවා ඒදණ්ඩ උඩ. අපිව දැකලා ඌ පැනලා ගියා.
බෙරවයන්නා : ඌ කොයි වගේද?
කපුරාල : ඌ හරියට ඇතෙක් වගේ
බෙරවයන්නා : ඉතින් ඉතින්
කපුරාල : ඌට කකුල් පහක් තිබුණා. අපි දැක්කම ජබුග් ගාලා ගඟට පැනලා බබුක් ගගා බුබුලු දාන්න පටන් ගත්තා.
බෙරවයන්නා : නොදෝකින්, මොන ඇතෙක් ද බං? ඒ ඉබ්බෙක්නේ.
කපුරාල : මොන ඉම්බද? ළඟට යන්න බෑ ගන්දස්සාරේ.
බෙරවයන්නා : ඉම්බා නෙවේ. මං කියන්නේ උඹ දැක්කේ ඉබ්බෙක් කියලා.

මී බන්ධනය පවත්වනු ලබන්නේ ගවයන්ට සෑදෙන ලෙස රෝග දුරු කිරීම සඳහාය. මී බන්ධනය නිරූපණය කෙරෙන්නේත් ඇත් බන්ධනයට සමාන ලෙසය. මීමා අල්ලන්න යන කපුරාල අන්දමන්ද දෝසය නිසා ගොන් වස්සකු නොව ගෝනුස්සකු දකී. නැවත වරක් ඔහු මීමෙකු නොව මීයෙකු දකී. නැවත වරක් ඔහු මී වස්සකු වෙනුවට මී මැස්සෙකු අල්ලන්නට බලයි. කෙළවර දී මීමා අල්ලනු ලැබේ. මෙහිදී මීමා නිරූපණය කරනු ලබන තැනැත්තා මීමාගේ ඉදිරි දෙපා ලෙස දෑතෙන් ගත් කෝටු දෙකක් ඇතිව පිටිපසට බැඳ ගන්නා ලද වලිගයකුත් ඇතිව පැමිණේ.