සිංහබාහු, සුප්පා දේවි : තර්ගය
සිංහබාහු :
තුමුල ගතින්දා
බාහු බෙලෙන්දා
වෙමි සේ තිදසින්දා
කුරිරු ගිජින්දා
කුඹු තල සින්දා
ලමි සේ කෙසරින්දා
මා පිය මිගදා කරනා විකුමන්
ඇයි මට බැරි වන්නේ
තර කර ගලිනා ඇති දොර තදිනා
ඉවත දමා වෙරෙනා
මහ හෙණ හඩිනා පහරා සැණිනා
පෙරළමි බාහුවෙනා
සුප්පා දේවි :
නොකරන් එලෙසා පියතුමගේ අණ
ඉක්මවලා පුතුනේ
නපුරුයි වන්නේ අප සැම දෙනටා
නොකළොත් කී ලෙසිනා
සිංහබාහු :
පටහැණි වෙන්ටා නොව ඔහු අණටා
වෙන මඟ ගැලවෙන්ටා
නොපෙනෙන කලටා සැරසෙනු කුමටා
මා දැන් වළකන්ටා
(නික්ම යයි)
පොත් ඉන්නිසය
සේ රිවි බිම්බා පතළ තෙද බලැති මහ රූ
මෙන රන් ටැම්බා නිසසල ගුණයෙන් සපිරූ
මනරම් යුග බා දී අහස ඔසවන යුරු
තෙ විකුම් සිහ බා පෙරළුවේය ගල් පුවරු
මෙන රන් ටැම්බා නිසසල ගුණයෙන් සපිරූ
මනරම් යුග බා දී අහස ඔසවන යුරු
තෙ විකුම් සිහ බා පෙරළුවේය ගල් පුවරු
සුප්පා දේවි : සින්දුව
වේ රුදු දෝසා කළ මේ දේ
මා පුතු නො තකා විපාකේ
මුව පත් වූයේ
නියත විනාසේ
මේ මොහොතේ කිම් කරනෙම් දෝ
මුළා වී මඟ නොපෙනේ
මා පුතු නො තකා විපාකේ
මුව පත් වූයේ
නියත විනාසේ
මේ මොහොතේ කිම් කරනෙම් දෝ
මුළා වී මඟ නොපෙනේ
යන්නට වේ දැන් සැමියා හැරා
වන වාසෙන් මෙ පුතු සමඟා
දරුවන් දෙදෙනා
හට සෙත් ලැබෙනා
මඟ ඔස්සේ යා යුතු වන්නේ
නොසැලී කිසි මෙම වේලේ
වන වාසෙන් මෙ පුතු සමඟා
දරුවන් දෙදෙනා
හට සෙත් ලැබෙනා
මඟ ඔස්සේ යා යුතු වන්නේ
නොසැලී කිසි මෙම වේලේ
දෙවියන් බාරයි මා සමිඳා
මා වෙත නොවනු ය කෝපා
දරුවන් සන්දා
කරනෙම් මෙබන්දා
සිහි වේ හැම කල් හද සෝකෙන්
සමා වනු ඇත වරදා
මා වෙත නොවනු ය කෝපා
දරුවන් සන්දා
කරනෙම් මෙබන්දා
සිහි වේ හැම කල් හද සෝකෙන්
සමා වනු ඇත වරදා
(සිංහබාහු ආපසු පැමිණේ)
සිංහබාහු : වචනය
සිංහබාහු : වචනය
මා ගල පෙරළා ලෙන් දොර හැරිය බව ඔබ දන්නෙහි ය, මෑණියනි. අවට ලෝකය ඉතා රමණීය වේ. කිසිදු බියක් සිතට නොනැගේ. ඔබ හා නැගණියෝ ද මා සමඟ යන්ට කැමැත්තහු නම් මගේ අධිෂ්ඨානය මුදුන්පත් වේ. යළිත් සිතා බලනු මැන.
සුප්පා දේවි : වචනය
නුඹගේ ද නුඹ නැගණියන්ගේ ද යහපත පිණිස මම නුඹ පියාණන් හැරපියා යන්ට සනිටුහන් කර ගතිමි. මා මෙසේ කරන්නේ හද තුළ ඇති මහත් වේදනාවකිනි. දිවි හිමියෙන් මා ඒ වේදනාවෙන් පෙළෙන බව දනිමි. යමු දරුවෙනි.
සිංහබාහු : වචනය
ඔබේ සනිටුහන ඉතා යෙහෙකි, මෑණියනි. නැගණිය මා වම් උරහිස මත ද ඔබ මා දකුණු උරහිස මත ද තබාගෙන මේ ගොරතර වනාන්තරයෙන් එතර වන්නෙමි.
(තිදෙනා නික්ම යති)
ශිල්ප 64