මිතුර, ඒ යතින්ද්‍රයාට විඥාපතිය කොට ප්‍රථමෝද්දිෂ්ට විශිෂ්ට සදිෂ්ට සන්දේශයට දැන් ප්‍රාප්තාවසර ඇත්තේය. එයිදු ස්වර්ණ කර්ණාවතංස කර.

පවර මුනි වදහළ - පිළිවෙත් නොහෑරම වසන

සසග පවර සැප සැබවින් සිදු කරන
සමග මහඟු මහ සඟ ගණ මෙහෙවරින

මුළු ලොවට වැඩ වන - තෙපලක මෙමා පවසන

නිතොර සතන් වෙත දක්වා මෙත් කුලුණු
නොහැර මෙසිරි ලක්දිව රැකුමෙහි දැපුණු

පැලඳි මුනිඳු සිරි පද කමල උතුම'ඟ
වැලඳි සුසිරි මනු රද නිති කොමළ'ඟ
පැහැදි ගැමුණු නරනිඳු සේ දහම් මඟ
සුසැදි මෙසිරි පැරකුම් නරනිඳු සමඟ

සමුදුර හිමි අවට - සව් සිරි සපිරි සිරි ලක

අමා කර කිරණ සේ පිරිසුදු දිවැස
යොමා කුලුණු ගුණයෙන් දැක ඇම දවස

අමිතුරු රෝග බිය යක් උවදුරු දුරට
පෙන්වා තමා බෝසත් බව මුළු ලොවට

නොහෑර විජය සුබ සිරි සැප දියුණු කොට
නිතොර රකින ලෙස සහපිරිවරින් සිට
අදර සිතින් අයදින ලෙස නතිඳුහට
මිතුර තොසින් සැළ කර ඒ යති සඳුට

පමණින් දස දහස් - යොදුන් වූ දඹදිව සිට

මුනි තුන්තරා ගමනක් වැඩ සිරි ලකට
මතු අන්තරා හැර යක් සෙනඟ දුරු කොට

පිහිටන ලෙස සසුන් - සැලසිය බලා දිවැසින්

තුස්වා සුරාසුර ලොව එක ලෙස දිස්න
පස්වා දහස් පවතින ලෙස බුදු සස්න

සිත සතොසේ රකිනුව ඇම වර නොහැර
හිම කර සේ ලොව දක්වා යස විසිර
දිලි වෙසෙසේ එම නතිඳුට යළි මිතුර
යදින ලෙසේ සැළ කර තෙරිඳුට පවර

ආසී

තතු මෙවදන් දන්වා අප කී ලෙසට
කිතු ලිය මල් ගන්වා දිගු බිත අවට
සිතු සතොසින් සකි වැඩ සිදු කළ ලොවට
මතු දෙලොවින් සුබ සිරි සිදුවෙයි තොපට

පියවි පිය ගමන් නොහැරම ගොස් ම සඟ
ගිය කාරිය සැළ කොට සිදු කර සිතග
කියවා දිය සියල් තොප යස රැස නොවග
සියනෑ සියව පවතුව සුමිතුරු සමඟ