සුර පුර පිරි සියල්
පැවසූ තමන් මෙ තෙපුල්
රිවි කිරණින් නිමල්
පුබුදු කරවිය දනන් මනවිල්

දිව්‍ය ලෝකයේ සියලු සැපත් කීවා වු තමන්ගේ මේ වදන් නමැති හිරු රැසින් ජනයන්ගේ සිත් නමැති පියුම් විල් පුබුදු කරවූයේ ය.

දෙරණ උඩු යටි කොට
එහි අම රසය කැටි කොට
දෙන මෙන් මුළු ලොවට
නිවන් දෙන දම් දෙසන හැමවිට

පොළොව මුණින් අතට හරවා (යටිකුරු පොළොව උඩුකුරු කරවා) එහි ඇති (පප්පිටක නම්) රසය කැටිකොට සියල් ලෝ වැසියන්ට දෙන්නා සේ නිවන් දෙන්නා වු ධර්මය සියලු කල්හි ම වදාරන.

බුදු කෙනකුන් ලෙසා
නිති පර වැඩ ම උදෙසා
පැවසූ බණ අසා
එ කල් මුළු ලෝ දනෝ මෙලෙසා

බුදු කෙනකුන් මෙන් නිතර ම අනුන්ගේ වැඩි දියුණුව ම සඳහා කීවා වූ බණ අසා එකල්හි මුළු ලෝකයේ ජනයෝ මේ පරිද්දෙන්,

සුර සැපතෙහි බැඳී
දස අකුසලෙහි නො යෙදී
සිහි නුවණින් යෙදී
නොමඳ පින් රැස්‌ කලෝ පැහැදී

දිව්‍ය සම්පත්තියෙහි බැඳී දස අකුසලෙහි නො යෙදී සිහි නුවණින් යුතු ව පැහැදී බොහෝ පින් රැස්‌ කළෝ ය.

සත වෙත පතළ මෙත්
වෙර බැඳ ම වෙත මැදහත්
අනුවණ මෙ දෙව්දත්
මෙසේ නැසුණෝ වේ ද පළමුත්

සත්වයන් කෙරේ පතළ වු මෛත්‍රිය ඇති, මැදහත් වූ මා වෙත වෛර බැඳීමෙන් නුවණ නැති මේ දෙව්දත් තෙමේ මීට පළමු ද මෙසේ නැසුණේහු වේ ද ?

සඟ මොක්‌ දෙන නිසී
එක එක බසින් සුබැසී
තුටු කර එකරසී
ඇසූ බඹ සුර නරන් එකසී

සුභාෂිත වු එක්‌ එක්‌ වචනයෙන් දිව්‍ය සම්පත්තියෙන් නිර්වාණ සම්පත්තියෙන් නිසි පරිදි දෙන, ඒ බුදුරජාණන් වහන්සේ, (නරසී) සවන් දුන් බඹුන්, දෙවියන්, නරයන් එක සේ සතුටට පමුණුවා.

අටගින් යුතු නදා
මියුරු බස ගොස විහිදා
සිවු සප් සහ යොදා
දෙසා නිම වී මෙ ගුත්තිලදා

අංග අටකින් යුක්‌ත වු ප්‍රියකර මධුර බ්‍රහ්ම ඝෝෂය පතුරුවා චතුරාර්ය සත්‍යය හා ගළපා මේ ගුත්තිල ජාතකය වදාරා අවසන් කළ සේක.

මුළු ලොව වැවේවා
දුඛිත් දුක්‌ දුරු වේවා
සුසිරි ළඟ වේවා
රජුට දිය වැඩ මඟුල් වේවා

සියලු ලොව වැඩි දියුණු වේවා. දුර්භික්‌ෂ දුක්‌ඛය දුරු වේවා. හොද පැවතුම් ළගා වේවා. රජුට ජය, අභිවෘද්ධිය යන මංගල්‍යය ම වේ වා!