නො හැඳින පුරඳුරූ
වැන්දැයි කියා පිළිරූ
වන බියෙන නිසරූ
විමස විමසා සිටිත ඇදුරූ
සක්‌ දෙව් නොහැඳින පිළිබිඹුව වැන්දේ යැයි මදිකමක්‌ වන බියෙන් ඇදුරා විමසිල්ලෙන් සිටින විට...
දුරැර ඔහු කුහුලී
මෙහෙයා නෙතිදු මිණි ලී
පුරදුරු මනකලී
සතුටු විය යුතු තෙපුල් තෙපලී
ඔහුගේ කුතුහලය දුරුකරමින් නෙත් කැලුම් නමැති ඉඳු නිල් මැණික්‌ රිටි මෙහෙයවා (යවා) සක්‌ සුරිඳා, සතුටු වීමට සුදුසු වදන් පැවසී.
ඔහු කී බස්‌ අසා
නැමඳ බෝසත් සකසා
දෙන පඬුරක්‌ ලෙසා
මෙලෙස රස මුසු බසින් පවසා
බෝසත් තෙමේ ඔහු කී වදන් අසා මැනවින් නැමඳ පඬුරක්‌ පිළිගන්වන සේ රසවත් වචනයෙන් මෙසේ කියයි.
සුර රුපු යස පැහස
පෙන්නූ තමා යස රැස
සුර ඉසුරෙන් සිරස
සරණ තඹරින් සැරූ සහසැස
අසුරන්ගේ කීර්තිය යටපත් කොට තමාගේ කීර්ති රාවය පෙන්නුවා වු උසස්‌ දෙවියන්ගේ හිස, පතුල් නමැති නෙළුම් මලින් සැරහූ සුරිදුනි,
පැහස - යටපත් කොට
දුරු කර නො දැන්මා
ලබමි මතු සුර දැන්මා
පිහිටි නර දැන්මා
කිමෙක ගෙන්වූ කරුණු දැන්මා
අඥාන භාවය දුරු කොට මතු දිව්‍ය ඥානය ලබමි. මනුෂ්‍ය ජන්මයහි පිහිටියා වු මා දැන් ගෙන්නූ කාරණා කිම් ?
තෙලෙ සුරඟනෝ යැද
ඇදුර තොපගේ වෙණ නද
කිවුය ඇසියටි සඳ
එයින් ගෙන්වූයෙමි මෙ තොප අද
ඇදුරාණෙනි, අද දෙව්ලියෝ තොපගේ වෙණ නද අසනු කැමැති ව අයැද සිට දැන්වූවෝ ය. එහෙයින් අද මෙතොප ගෙන්වූයෙමි.
මින් වුව මනායා
අස්‌නෙක ඉඳ මනායා
තුටු කර මනායා
කියත කරවයි ගායානාය
මෙයින් කැමති සුදුසු අස්‌නෙක හිඳ ගෙන සිත සතුටු වන පරිදි ගායනා කරවයි කී විට.
හිමි සඳිනි සුරපති
ගඳඹ ඇදුරන් සේ නිති
පවතින මේ සිරිති
නොමිලයේ ගායනා නොකෙරෙති
දෙවියනට අධිපති වු හිමියාණනි, සංගීතාචාර්යයන් කෙරේ නිබඳ ම පවත්නා සිරිත යි (ඔවුහු) නොමිලයේ ගායනා නො කරත්.
කරව සිතු පැහැදේ
වෙණ ගායනා මෙ සඳේ
මෙ තොප දොළ පසිඳේ
දෙමැයි කී දෙවිඳු රිසි රිසි දේ
මේ වේලාවේ චිත්ත ප්‍රසාදය (සිත් පහැදීම) ඇති වන ලෙස වීණා ගායනා කරන්න. ඔබගේ සිතේ ඇති ආශාවට අනුව කැමැති කැමැති දේ දෙන්නෙමි යැයි දෙවිඳු කී ය.
මෙ සුරඹ පෙර දවස
කළ පින් කියත තතු ලෙස
කර අප සිත සතොස
එමය මිල දීම නම් සහසැප
මේ දිව්‍යාංගනාවන් යටගිය දවස කළා වු පින් අපගේ සිත සතුටු වන පරිදි තතු ලෙස කියත හොත් සක්‌දෙව් රජුනි, එය ම මිල දීම නම් වේ.
ශිල්ප 64