පන් සිළු වීණා නා පසු බැස්‌වූ
මන් පිනවන වෙණ නදයෙන් තොස්‌ වු
නන් දන කැන් දුටුව ද බිය සිස්‌ වූ
මින් රළවුන් ගං වෙරළට රැස්‌ වූ
පංචසිඛ (නම් දිව්‍ය ගාන්ධර්වයා) වීණා නාදය යටපත් කළ, සිත් සතුටු කරවන (ඒ) වීණා නාදයෙන් සන්තෝෂයට පැමිණි මත්ස්‍ය සමූහයා නොයෙක්‌ ජන සමූහයා දුටුවත් බියක්‌ නැති ව, ගං ඉවුරට එකතු වූහ.
වර වෙණ නද අසමින් සිත් සතොසිනි
සර හැර සියොතුන් පියපත් විදමිනි
පුර'ඹර වසමින් සිටි රඟ කුම් වැනි
සුර සෙනඟට සුර'සුන් පැනවූ වැනි
උතුම් වීණා නාදය සිතේ සතුටින් යුතු ව අසමින් ගමන් නවතා පක්‌ෂීන් පියාපත් විදහා ගෙන නගරයෙහි අහස වසා ගෙන සිටි අයුරු කවර ආකාර ද, කිවහොත් දුව්‍ය සේනාව දිව්‍ය ආසන පනවන ලද්දාක්‌ මෙනි.
සර - (චාර) ගමන
යොදා සවන් වෙණ නද රස සුලබව
නදා එකග සිත් වන නොම සකොබව
සදා කුලය නොහැර ම එන අසුබව
එදා ගියේ රිළවුන් සන්සල බව
රස සුලබ වූ වීණා නාදයට සවන් දී කැළඹීමට පත් නොවී සතුටින් සිත එකගවන කල්හි, තමාගේ අශෝබන ලෙස අත්නොහැර ම ගෙන එන රිළවුන්ගේ චංචල ගතිය ඒ දිනයෙහි දුරු වී ගියේ ය.
අසූභව - අශෝබන ලෙස
ඒ මාසත්හු එ නදට අසමානය
සමා නො වෙති කොවුලෝ උපමානය
තමා නාද මිහිරැයි යන මානය
දමා එයින් වින්දෝ අවමානය
ඒ බෝධිසත්වයන්ගේ අසමාන වු ඒ වීණා නාදයට කොවුලෝ උපමාන වශයෙන් සම නොවෙති. එහෙයින් ඔවුහු තමාගේ නාදය මිහිරි යැයි කියන උඩගුකම අතහැර දමා අවමන් වින්දාහු ය.
මාසතහු - (මහා සත්ව) බෝධිසත්වයන් වහන්සේ.
අසන රිසින් නයි කැල ඔසළෝයා
ඔවුන වෙත ම සිටිනා ගුරුළෝයා
වයන ඒ වෙණ නද ලොබ ම කළෝයා
එදින වයිර සිත සිහි නො කොළෝයා
(වෙණ නද) අසනු කැමැත්තෙන් නාග සමූහයා රැස්‌ වූහ. ඔවුන් ළග ම සිටින්නා වු ගුරුළෝය. (ඔව්හු) වාදනය කරනු ලබන්නා වු ඒ වීණා නාදය ම ආශා කළහ. ඒ දවසෙහි (ඔවුනොවුන්ගේ) වෛර සිත සිහි නො කළහ.
බැඳි දන මන වැයුමෙහි අඳුරෝයා
විඳි සත් සර වෙණ නද මදුරෝයා
රැදි සතොසින් සැනහුනු ඉඳුරෝයා
වැදි දන සිරි ගත්තුය කිඳුරෝයා
(ඔව්හු) දනන්ගේ සිත් ඇද ගත්තා වු වාදනයෙහි ඇඳුරෝ වු, ස්‌වර සතක්‌ ඇති වීණා නාදයෙහි මිහිර වින්දා වු, සන්තෝෂයෙන් බැඳුණු සන්සුන් ඉඳුරන් ඇති ඒ කිඳුරෝ වන්දිභට්‌ටයන්ගේ ආකාරය ගත්තාහුය.
සතොස්‌ කරන වීණා නද ඇසුමට
නොගොස්‌ සිටින පිල්බර ගණ ගොදුරට
වෙසෙස්‌ රුවින් තම මැවුවත් බඹහට
සඳැස්‌ සවන් නො කළැයි වු නො සතුට
සතුට ඇති කරන වීණා නාදය අසනු පිණිස, අහර සෙවීම සඳහා, නො ගොසින් සිටින්නා වු මොනර සමූහයා, විශේෂ රූප සම්පත්තියෙන් යුතු කොට, තමන් මවන ලද මුත් තම සඳැස්‌ (පිල්වල ඇති සඳ ලකුණු) කන් බවට පත් කලේ යැයි මහබඹු කෙරෙහි අමනාප වූහ.
සඳැස්‌ - (චන්දාඅක්‌ෂි) (සඳ+ඇස්‌) පිල්වල ඇති සඳ ලකුණු
පිල්බර - මොනරා - පිල් සමූහයක්‌ ඇත්තා
වෙසෙසින් යන නද දිගත පුරායා
අසමින් තුරු හිස රඳන ගිරායා
උමුවෙන් ගත් මී අඹ මියුරායා
දැමුවෙන් වෙණ නද මය මියුරායා
විශේෂයෙන් දිශාවන් පිරී (ඉතිරී) ගෙන පැතිර යන්නා වු වීණා නාදය අසමින් ගස්‌ මුදුනෙහි, නැවතී හිඳිනා ගිරවුන් උඩුකුරු කරන ලද මුවෙන් ගන්නා ලද මී අඹ අත්හැර දැමීමෙන් වීණා නාදයම (උන්ට) වඩා මිහිරි විය.
උමුවෙන් - (උන් මුඛ) උඩුකුරු මුව
රුති වනපෙතිනැවිදින් සමුවෝයා
නිති මියුරැති වෙණ නද ළමුවෝයා
සිතිවිලි නැති රූ විලස මුවෝයා
තැති නො ගනිති මිනිසුන් හමුවෝයා
මුවෝ රංචු ගැසී (තමන්) කැමති කැලෑ පෙදෙසින් අවුත්, අතරක්‌ නැති මිහිරි වීණා නාදයට සිත් යොමා සිටිති. සිතිවිලි රහිත රූප බඳු වු මුවෝ මිනිසුන් හමු වූවාහු ද බිය නො වෙත්.
නොගොසින් සිට සිටි වන නිබදේයා
වෙසෙසින් සුර නර සෙන් නොමදේයා
සතොසින් විඳ විඳ ලොබ නොසිදේයා
මෙලෙසින් වෙණ නද අසන සදේයා
විශේෂයෙන් බොහෝ දෙව් මිනිස්‌ සේනාව බැහැර නොගොස්‌ සිටිවන ම සිටිමින්, කොපමණ ඇසූවත්, ඇති වීමක්‌ නැති ව, සතුටින් රස විඳිමින්, මේ අයුරින් වීණා නාදය අසන කල්හි.
ශිල්ප 64