ශක්‍ර දේවේන්ද්‍රයා වැනි බ්‍රහ්මදත්ත රජතුමා මිහිරි වු වීණා නාදය අසනු පිණිස සූදානම් වී නගර වැසියන්ට නො වරදවා රැස්‌වන්ට හැකි වන පරිද්දෙන් සියලු නගරයෙහි අණ බෙර ගස්‌වා-

පිරිවර රසයෙන් සමඟ ව ඉඳිනට
සරිකර පුරඳුරු විජයොත් පායට
මෙනුවර මැද මඬුවක්‌ විසිතුරු කොට
මෙහෙවර කී කරවයි අගමැති හට

පරිචාර රාජ සේනාව සමඟ එක්‌ ව හිඳිනු පිණිස ශක්‍රයාගේ වෛජයන්තප්‍රාසාදයට සමාන වන පරිද්දෙන් මේ නගරය මැද මණ්‌ඩපයක්‌ විචිත්‍ර අයුරෙන් කරව යි අග්‍රාමාත්‍යයාහට විධානය කළේය.
විජයෝත්පාය (වෛජයන්ත ප්‍රාසාදය) ශක්‍ර දෙවියන්ගේ විමානයයි.

නිරිඳු එසඳ වදහළ බස්‌ පිළිගෙන
පුරුදු සියල් සිප් සතරෙහි වෙසෙසින
පසිඳු නොයෙක්‌ ඇදුරන් රැස්‌ කරමින
මැතිදු නිදොස්‌ දිගු පුළුලැති බිම ගෙන

එකල්හි අගමැතිවරු රජු කී වදන් පිළිගෙන සියලු ශිල්ප ශාස්‌ත්‍රයෙහි මැනවින් පුහුණු වූ ප්‍රසිද්ධ බොහෝ ආචාර්යවරයන් එකකු කොට දොස්‌ නැත, දිග හා පළල ඇති බිම් කොටසක්‌ තෝරා ගෙන,

පුරවාසින් සමඟ ව රජු ඉඳයා
වෙණ වාදය අසනු ව රස විඳයා
සොඳවා දන මන වන ලෙස වඳයා
කරවා මහ මඬුවක්‌ පුර මැදයා

නුවර වැසියන් හා රජු එක්‌ව හිඳගෙන රස විඳිමින් වීණා වාදනය අසනු පිණිස ජනයාගේ සිත් සතුටු වන පරිද්දෙන් නගරය මැද මනා කොට  මහා මණ්‌ඩපයක්‌ කරවා,

ඇඳ සිතියම් සිත තුටු කර ඇමගේ
නද දෙන හැම සඳ මඳ මඳ සුළගේ
නඳ මුතු මිණි රන් රසු දැල් පළගේ
බැඳ රන් දද බබළන මිණි යටගේ

සියල්ලන්ගේ සිත් සතුටු වන සේ සිතියම් ඇඳ මඳ මඳ ව හමන සුළඟෙහි සියලු කල්හි නාද නඟන මුතු මැණික්‌ බැඳි (නද) කිකිණිදැල් පියසි අග, රන් කොඩි බබළන මැණික්‌ අග ද බැඳ,
පළඟේ (පළ+අගෙහි) පියස්‌ස කෙළවර
නද - (නද්ධ) බැඳි

සුදු පිරිසිදු වියනුත් උඩ බඳවා
මුදු ඉඳුවර මල් දම් එහි රඳවා
විදු කිඳ'යුරු රන් රසු දැල් යොදවා
සැදු සුරසිදු බඳු වට තිර අදවා

සුදු පාට නොකිලිටි වියන් ද, උඩ බඳවා, මොළොක්‌ වු නිල් මහනෙල් මල් මාලා ඒ වියන්හි එල්ලා, විදුලිය කෙඳි වැනි රන් (මිණි ගෙඩි) කිකිණි වැල් යොදවා අලංකාර වුණු අහස්‌ ගඟ බඳු වු වට තිර අද්දවා

සුවඳින් බිම පිරිබඩ ගෙන මොනවට
සදමින් සිහසුන මුතු සේසත් යට
තබමින් දෙපසෙහි දිලි රන් මිණි වැට
ඉසිමින් අසෙනිය මල් විසිතුරු කොට

(මණ්‌ඩපයේ) බිම මනාසේ සුවඳින් ආලේප කොට (බිම සුවඳ ගා) මුතුවැල් වල්න් යුත් සුදු කුඩය යට සිංහාසනය සාදා දෙපැත්තෙහි බබළන රන් මුවා, මිණිමුවා, පහන් (වැට) තබා විචිත්‍ර ලෙස ලද පස්‌ මල් (අසෙනිය) ඉස-
අසෙනිය - (අර්චනීය, පූජා පිණිස ගන්නා)
අසෙනිය මල් - ලද පස්‌ මල් (විළඳ, ඊතණ, සුණුසහල්, සමන්කැකුළු, අබ)

වෙසෙසින් දුටු දුටු සත සිත පහදා
මෙලෙසින් මනහර ඒ මඬුව සුසදා
සිරසින් රජු සිරි සරණත නැමදා
සතොසින් දැන් වූ සඳ ඒ මැතිඳා

දුටු දුටු ජනයාගේ සිත විශේෂයෙන් පහදින ලෙස, මේ ආකාරයෙන් ඒ සිත්කළු මණ්‌ඩපය මනා සේ සරසා නිම කොට, (ඉක්‌බිති) රජුගේ සිරිපා හිසින් (නළල බිම තබා) වැඳ ඒ මහ ඇමතිතුමා සතුටින් සැල කළ කල්හි,

සොද පුන්සඳ සොමි කිරණින් පිහිකුළු
නඳ සුරහඟ රළ වට කළ සුලකුළු
නඳ සිරිසර පාමින් රන් ගිරිකුළු
ඇඳ පිරිසිදු සුදු සිනිදු කසීසළු

සුන්දර පුර සඳෙහි සිහිල් කැල්මෙන් වැසුණා වු, (පිහිකුළු) අහස්‌ ගඟේ රළ පෙළින් වට කරන ලද්දා වු ද, මැනවින් අලංකාර වු ද, රන් ගිරි කුළෙහි (මහමෙරෙහි) මනහර ශෝභාව දක්‌වමින්, නොකිලිටි සුදු මොළොක්‌ කසී සළු ඇඳ ගෙන,

හිමකර සුරසිදු කොඳ මුතු හරෙහී
පැහැසර යුරු සුඳගර ගෙන වෙරෙහී
මලකර පලු පල වැනි සුර තුරෙහී
මනහර සිව් සැට බරණින් සැරහී

සඳ, අහස්‌ ගඟ, කොඳ මල්, මුතුහර යන වස්‌තුන්හි පැහැයෙහි දීප්තිය (පැහැය) මෙන් සුදු වු අඩ්ගරාග (ඇඟ ගල්වන විලවුන්) ඇගෙහි තවරාගෙන, දෙව් රුකෙහි මල්, රිකිකි (අතර) දලු, ගෙඩි වැනි වු සිත්කලු අබරණ හැට සතරින් සැරසී...
අතර (අංකුර) රිකිලි/අකු