දුනිමි වෙණ සිප් සොඳවා
එතෙම දැන් තදවා
වාද කෙරෙමියි මෙම කැඳවා
ඔහු මා ළඟ නවත්වාගෙන වීණා ශිල්ප හොඳින් ඉගැන්විමි. හෙතෙමේ දැන් දැඩි ව වාද කෙරෙමි'යි මේ මා (වාදයට) කැඳවයි.
අග මුල නො විමසා
දුනිමි වෙණ සිප් සකසා
ඔහු සම වන නිසා
වනිමි සුරරද මෙ වන පෙදෙසා
අගක්‌ මුලක්‌ පරීක්‌ෂා නො කොට වීණා ශිල්පය මැනවින් ඉගැන්විමි. දෙව්රාජණනි, (දැන්) ඔහු (මා හා) සමාන වන බැවින් මේ කැලෑ පෙදෙසට වැදුණෙමි.
දහසක්‌ නුවන් ලද
මුළු ලොව බලන හැම සඳ
පසිඳු සක්‌ දෙව් රද
මෙ මට ඔබ හැර පිහිට කවුරුද
ඇස්‌ දාහක්‌ ලබා ඇති සියලු කල්හි මුළු ලෝකය බලන්නා වු ප්‍රසිද්ධ ශක්‍ර දිව්‍ය රාජයාණනි, මේ මට ඔබ වහන්සේ හැර කවර කෙනෙක්‌ පිහිට (වෙත්) ද?
එ බැවින් ඔහු දිනා
දිය දද දියත බඳිනා
ලෙසට මහ තෙදිනා
සුදුසු වරයක්‌ දෙවයි යදිනා
එසේ හෙයින් ඔහු පරදවා ලෝකයෙහි ජයකොඩි බඳින්නට හැකි වන පරිද්දෙන් මහත් වු තේජසින් යුක්‌ත වු යෝග්‍ය වරයක්‌ දෙනු මැනවැයි යාච්ඤා කරන්නාවු,
ලෙස උදය දිවයුරු
දුරු කර ඇදුරු දුක ඳුරු
පොබයා මුව තඹරු
මෙසේ පැවසී තෙපුල් පුරඳුරු
උදය හිරු මෙන් ගුත්තිල ඇඳුරුතුමාගේ දුක්‌ නමැති අඳුර දුරු කර මුහුණ නමැති පියුම පුබුදු කර ශක්‍රදේවේන්ද්‍ර තෙම මේ වදන් කී ය.
ගුත්තිල ඇඳුරු සඳ
ඔහු වාදයට වන් සඳ
වයව තත් සිඳ සිඳ
නැගෙයි නද සිඳි තතින් මන නඳ
ගුත්තිල ඇදුරුතුමනි, ඔහු වාදයට පැමිණි කල්හි තත් සිඳ සිඳ (කඩමින්) වාදනය කරන්න. සිඳින ලද තතින් සිත්ගන්නා නාදය නැගේ.
දියුණුව නොයෙක ලෙස
කර සව් සතන් සිත තොස
ඉතිර ගෙන බරණැස
පැතිර යන සඳ එ නද දස දෙස
ඒ නාදය නොයෙක්‌ අයුරින් දියුණු වී, සියලු දෙනාගේ සිත් සතුටු කොට බරණැස්‌ පුරය උතුරා ගෙන දස දිසාවන්හි පැතිර යන කල්හි.
මෙයින් එක ගුලියක්‌
දමව ඉන් තුන් සියයක්‌
සුරඟන බැස පසක්‌
සතුටු කර නටති දන මනසක්‌
මෙයින් (මේ මා දෙන ගුළි තුනින්) එක්‌ ගුළියක්‌ (අහසට) දමන්න. එයින් තුන් සියයක්‌ දෙවඟනෝ බැස ප්‍රත්‍යක්‌ෂ ලෙස (ඇස්‌ ඉදිරිපිට) මිනිසුන්ගේ සිත් නෙත් සතුටු කොට නටන්නාහ.
සත (චක්‌ෂු) ඇස්‌
මෙ බඳු මේ ගුළි තුන
තෙපි යව ඇඳුරු ඇර ගෙන
මම ද එමි එම දින
කියා ගිය සඳහෙ සක්‌ දෙවිඳුන
ඇදුරුතුමනි, ඔබ මෙ වැනි බලවත් මේ ගුළි තුන රැගෙන යන්න. ඒ දිනයෙහි මමත් එන්නෙමි යි කියා සක්‌ දෙව් රජාණන් ගිය කල්හි.
පුන් සිසි කැලුම් බට
කොඳ මෙන් සතන් තුටු කොට
දිනමියි ඔහු මෙවිට
ගියේ බෝසත් තමාගේ ගෙට
බෝධිසත්ව තෙමේ පූර්ණ චන්ද්‍ර කාන්තිය වැටුනු (බට) කොඳ මලක්‌ මෙන් චිත්ත සන්තානය සතුටු කරගෙන දැන් ඉතින් ඔහු පරදවමි යි (සිතා) සිය නිවසට ගියේ ය.
ශිල්ප 64