ඒ කල්හි ඒ සංගීතාචාර්යවරයා තමා දන්නා වීණා ශිල්ප ඉතිරි නොකර පෙන්වා වෙළඳ ජනයා පොළඹවා ගෙන ඔවුන්ගේ ධනය ඉතිරී නො කොට ගනිමියි යන සිතින්.

 

වීණා ශිල්පය දක්‌වා ණය නො වී ඉඳිමියි (වීණා අලුව) වීණා දණ්‌ඩ සමඟ වීණාව තද කොට සකසා ගෙන
උපවිණය - වීණා දණ්‌ඩ, වෙණ අලුව

මින් මුන් මනායා
කෙරෙමියි තොස මනායා
සිතින් සමනායා
කෙළෙද වීණා ගායනායා

මෙයින් (මේ ගායනයෙන්) මොවුන්ගේ සිත් මැනවින් සතුටු කෙරෙමියි සිතින් තීරණය කර ගෙන (සමනා) වීනා ගායනය කළ නමුත්

බසෙකින් නොදන්නා
කියන පුවතට පෙන්නා
නොසතුටු ව ඉන්නා
දනන් මෙන් උන් බලා ඉන්නා

නො දන්නා භාෂාවකින් පෙන්නා කියන දෙයකට සතුටු නො වී ඉන්නා මිනිසුන් ලෙස ඔවුන් සිටිනු බලා

දැන් මින් මේ වෙළඳ
දනෝ වෙත්ටයි මන නඳ
කරන මෙන් වෙණ නඳ
මැදුම් සැදුමෙන් සදා එම සඳ

(මූසිල තෙමේ) දැන් මේ වෙළඳ ජනයෝ මෙයින් සතුටු සිත් ඇත්තෝ වෙත්වා යි (සිතා) අනෙක්‌ නාදයක්‌ ඇතිකරනු පිණිස එවිට මැදුම් හඬින් (මධ්‍යම මුර්චනා) (සුදුසු පරිදි වීණාව) සකස්‌ කොට

සැරයට ලං නොවන
ළිහිණියකු අත් පසුරෙන
ගනිමියි තැත් කරන
එකකු මෙන් ගායනා කරමින

ඊතලයට සමීප නොවන ළිහිණියකු (කුරුල්ලකු) අතේ ඇඟිලි විදහා අල්ලා ගනිමි/යි උත්සාහ කරණ එකෙකු සේ ගායනය කෙරෙමින්-

එද'සා තුටු නොවන
ඒ වෙළඳ දනන්ගේ මන
තුටු කරවන සිතින
එකකු මෙන් ගායනා කරමින

එයද අසා සතුටට පත් නොවන්නා වු, ඒ වෙළඳ ජනයාගේ සිත් සතුටු කරන අටියෙන් (අදහසින්) වීණාව ලිහිල් කොට සාදා ගෙන,

වෙසෙසින් නියම කොට
දුන්නත් ඉසුරු මුළු රට
තුටු නොවන එකෙකුට
ගමක්‌ දෙන මෙන් සතුටු පඬුරට

විශේෂයෙන් නිශ්චිත කර ඉසුරු සහිත මුළු රට ම, දුන්නත් සතුටු නොවන කෙනෙකුට, සතුටු පඬුරු වශයෙන් ගමක්‌ දෙන්නාක්‌ මෙන්,

මියුරස ගී සමග
කර ගායනා මනරග
එවිට ද උන් එරග
බලා නොසතුටු සිතින් උන් රග

මිහිරි රසැති ගී ගායනා සමඟ, සිත් ගන්නා පරිදි වීණා ගායනා පවත්වා, එවිට ද ඔවුන් ඒ රැහ;මෙහි නොසතුටු සිතින් යුතු ව සිටි ආකාරය බලා-

නො මිහිරි ද මේ වෙණ
ඇසූවහු ද මින් වැඩි වෙණ
නැතහොත් නැත නුවණ
කියව නොසතුටු වන්ට කාරණ

මේ වීනා වාදනය අමිහිරි ද ? මීට වඩා මිහිරි වෙණ වාදනයක්‌ අසා ඇති ද? එසේ නොවේ නම් (ඔබට) නුවණ නැද්ද ? සතුටු නොවන්නට හේතු කියව.