කෙළිමින් තැන තැන ලන්දු
දෙන මෙන් කන අම බින්දු
කියමින් සොඳ ගී සින්දු
ඇසුවොත් සිත දුක්‌ සින්දු
කාන්තාවෝ තන්හි තන්හි ක්‍රීඩා කරමින් කනෙහි අමා බින්දු හෙළන්නාක්‌ මෙන් මනා ගී සින්දු කියමින් ඇසූ දනන්ගේ සිත්හි දුක නැති කළහ.
පසුකර රුසිරෙන් සුරඹා
ගොසකර රන් මිණි සලඹා
එනුවර කෙළි රඟ පුරඹා
බඹ සර සිතවත් කළඹා
රූපශ්‍රීයෙන් දෙවඟනන් පසු බස්‌වා, රනින් කළ මිණි සලඹ හඬවා පුර ස්‌ත්‍රීන් ඒ නගරයෙහි රඟ දුන් දන්දම බඹසර රකින්නවුන්ගේ සිත් වුවත් කලඹයි.
පැහැ රඟන සුරන් රඟා
එපුර සියලු දන සරගා
නිතර කෙළිති සිතසෙ රඟා
කවර කලෙක වෙද එ රඟා
නටන දෙවියන්ගේ ආකාරය උදුරාගෙන ඒ නගරයෙහි සියලු දෙනා ආශා ඇති ව (සරඟා) සිත් සේ නටමින් නිතර ක්‍රීඩා කරති. එබන්දක්‌ (එ රඟා) කවර නම් කලෙක ඇති වේ ද ?
අසුරන් ජය ගෙන සිත සේ
සුරසෙන් කෙළි සැණකෙළි සේ
රිසි නන් වෙස්‌ ගෙන සොඳ සේ
සතොසින් සැණ කෙළිති මෙසේ
අසුරන් දිනා දිව්‍ය සේනාවන් සිත් ලෙස පැවැත්වූ උත්සව ක්‍රීඩා හා සමාන ව (මෙ පුර) ජනයා කැමති විවිධ වේශයන් (ගන්වා) ගෙන මෙසේ සතුටින් උත්සව ක්‍රීඩා කරත්.
පුරවා තුරු රැවින් අහස
කරවා ගී නැටුම් වෙසෙස
අරවා සත සිත දොම්නස
පුරවාසින් කෙළිත මෙලෙස
තුරුය නාදයෙන් අහස්‌කුස පුරවා, ගී නැටුම් විශේෂ පවත්වා, ජනයාගේ සිත්හි දොම්නස බැහැර කොට මේ අයුරින් නගරවාසීන් ක්‍රීඩා කරන කල්හි.
සුරපුර මෙන් බැබළි
එපුරෙහි සව් සිරින් දිළි
නුවරුන් නො වී මැළි
වෙළදු දැක ඒ කෙළින සැනකෙළි
දෙව්පුරය මෙන් බබළන සියලු සැපතින් (පිරී) දිලිසෙන එනුවර, නගර වැසියන් අලස නොව, පවත්වන ඒ උත්සව ක්‍රීඩා දැක වෙළෙන්දෝ.
රිසි රිසි දෙයැර ගෙන
නොයෙක ලෙස සැරසී ගෙන
නුවරුන් එක්‌ ව ගෙන
තුමු ද සැණකෙළියට පටන් ගෙන
කැමති දෙය ගෙන, නොයෙක්‌ ලෙසින් සැරසී නගර වැසියන් හා එකතු වී තුමු ද උත්සව ක්‍රීඩා කිරීම අරඹා-
තමන් මන් තුටු කොට
වීණා ගායනා වට
ඇදුරකු තම වෙතට
ගෙනෙන ලෙස පැවසුව ය එකකුට
තමන්ගේ සිත් සතුටු කොට වෙණ වැයුම පිණිස ආචාර්යවරයකු තමන් ළගට කැඳවා ගෙන එන ලෙස එකෙකු හට කීය.
එ තෙමෙ තම නුවරා
පසිඳු ව වසන ඉඳුරා
වෙණ වයන මියුරා
නමින් මූසිල ගඳඝ ඇදුරා
ඒ තෙමේ තම නගරයෙහි ඒකාන්තයෙන් ම ප්‍රසිද්ධ ව වෙසෙන මිහිරි ලෙස විණා වාදනය කරන මූසිල නමින් වු සංගීතාචාර්යවරයා.
දැක ඔහු උන් වෙතට
කැඳවා වුත් පළමු කොට
මිල දී සතුටු කොට
යෙදී වීණා ගායනාවට
හමු වී ඔහු (මූසිලයා) ඔවුන් (වෙළදුන්) කරා කැඳවා ගෙන අවුත් පළමුවෙන් ම මුදල් දී (සිත) සතුටු කොට වෙණ වයනු පිණිස යෙදවී.
ශිල්ප 64