රන් කිකිණි (මිණිගෙඩි) වැල්වලින් නාදවත් වූ ද, නොයෙක්‌ කොඩි පේළිවලින් ආලෝකවත් වූ ද, බබළන්නා වූ ද, ඒ නගරය ඇතුළෙහි පැවැත්වෙන මහා සැණකෙළි දුටුවෝ ය.

සදවා සුදු වැලි පිවිතුරු
බඳවා රන් දද පියකරු
සිටුවා දොර දොර රඹතුරු
තබවා පුන්කුඹු විසිතුරු

පිරිසිදු සුදුවැලි ඉස්‌වා සතුට වඩවන රන්කොඩි එල්වා, දොරක්‌ දොරක්‌ පාසා, කෙසෙල් ගස්‌ සිටුවා, නන් ලෙසින් සරසන ලද පුන්කලස්‌ තබවා-

සරා සලෙළු දන සතොසේ
සුරා පාන කරන ලෙසේ
පුරා අවුළු නොයෙක රසේ
සරා අවන් හල් සහසේ

සල්ලාල (සලෙළු) ජනයා හට සංචාරය කරමින් සන්තෝෂයෙන් රා බොන පරිද්දෙන්, නොයෙක්‌ රස ඇති කැවිලි (අවුළු) පුරවා දහස්‌ ගණන්සුරාපාන ශාලා සරසා-

උදා දිනිදු කර හරණේ
විදා අදුරු දිසි කිරණේ
යොදා දෙපස රන් තොරණේ
සදා මෙලෙස පුර දෙරණේ

උදා වන හිරුගේ රැස්‌ මෙන් අදුර දුරු කරමින් පෙනෙන කාන්තිය ඇති රන් තොරන් (මඟ) දෙපස බැඳ නගර භුමිය මේ අයුරින් සරසා-
තොරණේ - බහුවචන රූපයකි. වර්තමානයේ තොරන් යනුවෙන් යෙදෙනු පෙනේ.

සුවඳ සඳුන් කොකුමහරා
පැහැද තමන් වෙර තවරා
නොමඳ සලෙළු දන එපුරා
නිබඳ කෙළිති සතොස පුරා

ඒ නගරයෙහි බොහෝ වු සල්ලාල ජනයා, සුවඳවත් සඳුන් කොකුම් යන විලවුන් (අහරා) තමන්ගේ සිරුරෙහි (වෙර) තවරාගෙන සැරසී (පැහැද) සතුට වඩමින් නිතර ක්‍රීඩා කරති.
අහරා - (අංගරාග) විලවුන්

කියමින් ගී රස මියුරූ
තබමින් පදතල අනුරූ
බඳිමින් දනමන නුවරූ
කෙළිමින් යෙති බැඳ බහුරූ

මිහිරි රසවත් ගී කියමින් (ඊට) අනුව පා තල තබමින් ජනයාගේ සිත් ඇදගෙන, නුවර වැසියෝ කෝලම් වෙස්‌ මුහුණු බැඳගෙන ක්‍රීඩා කරමින් යති.
බහුරූ - විකාර රූප, වෙස්‌ මුහුණු

සුරඟන රඟ රඟ හළුවෝ
දුටු දන මන නෙත් වෙළුවෝ
මන යොන සර කුසුමළුවෝ
තැන තැන රඟ දෙති නළුවෝ

දෙවඟනන්ගේ නැටුමෙහි ආකාරය යටපත් කළා වු ද, ජනයාගේ සිත් හා ඇස්‌ බැඳ ගත්තා වූ ද, අනංගයාගේ මල් හී වලට දුනු බඳක්‌ වු ද නැට්‌ටුවෝ තන්හි තන්හි නටත්.

මනයොන - මනනොන යනු අනංගයා යි. සිතේ උපදින්නා යන අරුතිනි.
කුසුමළුවෝ - (කුසුම්-අළු) මල් හී විඳින දුනු බඳ යි.

රැගත් සුරා පිරූ විතින්
සුරත් තඹරු පෙති සෙ නෙතින්
පුවත් නොදැන බමන ගතින්
නටත් අයෙක්‌ සුරා මතින්

අතින් ගත් මත්පැන් පුරවන ලද කෝප්පයෙන් (විතින්) ද නෙළුම් මල් පෙති මෙන් ඉතා රතු වු ඇසින් ද කරකැවෙන සිරුරෙන් ද යුත් ඇතැමෙක්‌ සුරා මතින් ඇති තතු නොදැන නටත්.

සුවඳ කුසුම් වරලසෙහි
පැලඳ කපුරු හර උරෙහි
නොමඳ බරණ ලා සැරහී
නිබඳ කෙළිති ලියො පුරෙහී

කෙස්‌ කළඹේ සුවඳ මල් ද පපුවෙහි කපුරු මාල (හර) ද පැලඳ ගෙන බොහෝ වු ආභරණයන් පැළඳ සැරසී (ඒ) නගරහෙයි කාන්තාවෝ නිතර ක්‍රීඩා කරත්.

සලකවමින් සුරඹ ලෙසේ
නිසැක සබා මැද පිවිසේ
නොයෙක වළඹ නටති තොසේ
ඒ දැක කෙනෙක්‌ යෙද්ද කෙසේ

දෙවඟනන්ගේ විලාසය සිතට නංවමින්, සබය මැදට නිසැක ව පිවිස, නොයෙක්‌ නාටිකාංගනාවෝ නටත්. කෙනෙක්‌ ඒ (නැටුම්) දැක කෙසේ නම් (එයින් නික්‌මී) යෙද්ද.