ඇමෙරිකා එක්‌සත් ජනපදයේ පිහිටි යෙලෝස්‌ටෝන් ජාතික වනෝද්‍යානය ලොව පුරා මහත් ප්‍රසිද්ධියක්‌ උසුලන ස්‌ථානයක්‌. මෙය පිහිටුවන ලද්දේ වර්ෂ 1872 දී යි. මෙහි ඇති සුවිශේෂත්වය නම් ලෝකයේ පළමු ජාතික වනෝද්‍යානය මෙය වීමයි. වයොමිං ප්‍රාන්තයේ වයඹ දෙසට වන්නට පිහිටි යෙලෝස්‌ටෝන් උණු දිය උල්පත්, ඒකාකාර බෑවුම් ආදිය සහිත වනෝද්‍යානයක්‌. මේ ප්‍රදේශයේ ආදිවාසී ඇමෙරිකානුවන් වසර දහස්‌ ගණනක සිට ජීවත් වුණා. මෙයට මෙම නම ලැබී ඇත්තේ යෙලෝස්‌ටෝන් ගඟ අසල පිහිටි ස්‌වදේශිකයන් මිත්සි අඩාසි නම් කන්ද නිසයි. එහි තේරුම කහ කන්ද යන්නයි.
යෙලෝස්‌ටෝන් ජාතික වනෝද්‍යානය පිහිටා ඇත්තේ පුළුල් ගිනි කඳු සානුවකය. උද්‍යානයේ උසම ස්‌ථානය අඩි 11,358 ක්‌ වන අතර ඊගල් පීක්‌ කඳු මුදුනයි. මේ හරහා ගලාබසින යෙලෝස්‌ටෝන් නදිය කිලෝ මීටර් 1110 ක්‌ දිගින් යුක්‌තයි. එය ලෝක ප්‍රසිද්ධ ග්‍රෑන්ඩ් කැන්යොන් පෙදෙස පසුකොට ගොස්‌ යෙලෝස්‌ටෝන් විලට වැටෙනවා. මෙම විල අඩි 320 ක ගැඹුරෙන් යුක්‌තයි. මීට අමතරව ෂෝෂෝන්, ලූවිස්‌, හාර්ට්‌ නමින් තවත් විල් කීපයක්‌ ද මෙහි පිහිටා තිබෙනවා.
උණු දිය උල්පත්වලට ප්‍රසිද්ධ මෙහි ඇති උල්පත්වලින් වාෂ්ප සහ උණු දිය අඩි 170 ක්‌ තරම් ඉහළ අහසට විදිනු දැකගත හැකියි. මේ එක්‌ විදීමකට ඇතැම් විට වතුර ලීටර 45,000 ක්‌ පමණ අඩංගුයි. යෙලෝස්‌ටෝන් ජාතික උද්‍යානයේ විශාලත්වය අක්‌කර 83,800 ක්‌ පමණ වෙනවා.
ශිල්ප 64