RAM (රැම්) යන කෙටි නමින් හැඳින්වෙන සසම්භාවී පිවිසුම් මතකයේ මූලික ම කාර්යය මධ්‍ය සැකසුම් ඒකකයට අවශ්‍ය කරන දත්ත සහ උපදෙස් තාවකාලික ව රඳවා තබා ගැනීමයි. නශ්‍ය මතක කාණ්ඩයට අයත් වන සසම්භාවී පිවිසුම් මතකයේ ඇති සියලු දේ පරිගණකයේ විදුලිය විසන්ධි වීමත් සමඟ ම මැකී යයි. මේ හේතුව නිසා වැදගත් යයි හැඟෙන සියලු දත්ත හෝ තොරතුරු ද්විතීයික මතක ඒකකයක තැන්පත් කිරීම අනිවාර්යයෙන් ම සිදු කළ යුතු වේ.

පරිගණකයක කාර්යක්ෂමතාව (Efficiency of a computer) සඳහා සසම්භාවී පිවිසුම් මතකයේ ධාරිතාව ඉතාම වැදගත් වේ. අවශ්‍ය කරන පරිදි මතක ඒකක එක් කරමින් සසම්භාවී පිවිසුම් මතකයේ ප්‍රමාණය (ධාරිතාව) වැඩි කිරීම කළ හැකි ය. සසම්භාවී පිවිසුම් මතකයේ ප්‍රධාන ආකාර දෙකක් දැක ගැනීමට හැකි ය.

ඒවා නම්,
* ස්ථිතික සසම්භාවී මතකය (SRAM- Static Access Memory)
* ගතික සසම්භාවී මතකය (DRAM- Dynamic Random Access Memory)