51. වාහන එකිනෙක ගැටීම වැඩිම ප්‍රමාණයක් සිදුවන්නේ මංසන්ධි වලදී හෝ මාර්ග බෙදී යන ස්ථානයන්හිදී බැවින් අනෙක් රථවාහන, පයින් ගමන් කරන්නන් සහ මංසන්ධියෙන් හරවන වාහන ගැන විශේෂයෙන් සුපරික්ෂාකාරී වන්න. ඉදිරියට පැදවීම ප්‍රවේශම් සහිත යයි ඔබ මැනවින් දැනගත් විට පමණක් එසේ ගමන් කරන්න. වම් පැත්තට හෝ දකුණු පැත්තට හරවන වාහන විසින් කෙළින්ම ඉදිරියට ගමන් කරන වාහනවලට මාර්ගය ඉඩදිය යුතුය.


52. ඔබ මංසන්ධියකට ළඟාවීමට සෑහෙන වේලාවකට පෙර ඔබ ගමන් කළ යුතු මාර්ගය පිළිබඳව තීරණය කොට පසු බැලුම් කණ්නාඩිය බලා අවශ්‍ය නම් සංඥා දමා ඔබ ගමන් කරන දිශාවට උචිත ධාවන තීරුවට වාහනය යොමු කරන්න. ඊතල වලින් දැක්වෙන ධාවන තීරු සළකුණු සහ අනෙකුත් මාර්ග සළකුණු සහ සංඥාවන් අනුගමනය කරන්න. මංසන්ධියකදී වාහන ගමන් කරන සාමාන්‍ය ක්‍රමය ඉහත දැක්වෙන අංක 1, 2, සහ 3 දරණ රූප සටහන් මඟින් දැක්වෙයි.


53. මාර්ගයේ කෙළින්ම ඉදිරියට යාමට ඔබ අදහස් කරන්නේ නම්, ඔබ මාර්ගයේ වම් පැත්තෙහි රැඳී සිටිය යුතුය. ඔබ ධාවන තීරු තුනකින් යුත් මාර්ගයක ගමන් කරන්නේ නම් මධ්‍යම ධාවන තීරුව පාවිච්චි කරන්න. මාර්ගයේ මධ්‍යයට වඩාත්ම ආසන්නතම ධාවන තීරුව ඇත්තේ අන් වාහන පසුකර යන වාහන සහ දකුණු පැත්තට හරවන වාහන සඳහාය. මාර්ගයේ අයිනේ ගැටියට ආසන්නතම ධාවන තීරුව ඇත්තේ සෙමින් ගමන් කරන වාහන සහ වම් පැත්තට හරවන වාහන සඳහාය.


54. මංසන්ධියකට අවතීර්ණ වීමට පෙර එහි සපයා ඇති යම් රථවාහන පාලන සංඥා ක්‍රමයක් මගින් දෙනු ලබන විධානයන් සහ අනෙකුත් මාර්ග නීති ද, අනුගමනය කර උචිත ධාවන තීරුවෙහි ඇති ඔබගේ පිටවීමේ මාර්ගය කරා මංසන්ධිය හරහා ගමන් කරන්න.


55. වම් පැත්තට හැරවීමට පෙර කල්වේලා ඇතිව සංඥාව දෙන්න. ඔබගේ වම් පැත්තෙන් වෙනත් වාහනයක් විශේෂයෙන් පාපැදිකරුවෙකු හෝ යතුරුපැදිකරුවෙකු ඔබේ වාහනය පසු නොකරන බව ඔබගේ පසු බැලුම් කණ්නාඩියෙන් බලා හොඳින් දැනගෙන, ආරක්ෂා සහිත පරිදි හැකි තරම් මාර්ගයේ වම් පැත්ත ආසන්නයට ගමන් කරන්න. ඔබ වේලාසනින් මාර්ගයේ වම් පැත්තට මාරුවීමෙන් ඔබ වම් පැත්තට හැරවීමට අදහස් කරන බව, අනෙකුත් රථ වාහනවලට එක් ධාවන තීරුවකට වැඩි ප්‍රමාණයක් සපයා තිබිය හැකිය. සපයා ඇති යම් රථ වාහන පාලන සංඥා ක්‍රමයක් මගින් දෙනු ලබන විධානයක් පිළිපදින්න. එවැනි පාලන සංඥා ක්‍රමයක් සපයා නොමැති නම්, අනෙකුත් මාර්ග නීති අනුගමනය කර පිටවීමේ මාර්ගය කරා සුදුසු ධාවන තීරුවෙහි ප්‍රවේශමෙන් ඉදිරියට ගමන් කරන්න.

56. දකුණු පැත්තට හැරවීමට පෙර ඔබගේ පසු බැලුම් කණ්නාඩියෙන් බලා පැහැදිලිව සංඥාව දක්වන්න. මාර්ගය ආරක්ෂා සහිත වූ විට මාර්ගයේ මධ්‍යයේ සිට මඳක් වම් පැත්තට සිටින සේ හෝ දකුණු පැත්තට හරවන වාහන සඳහා වෙන් කර ඇති ධාවන තීරුව තුළට හෝ පදවන්න. සපයා ඇති යම් රථවාහන පාලන සංඥා ක්‍රම මගින් දෙනු ලබන විධානයන් අනුගමනය කරන්න. ප්‍රතිවිරුද්ධ දිසාවට එන රථවාහන අතර, ආරක්ෂාකාරි ඉඩක් ලැබෙන තුරු සිට ඔබගේ පිටවීමේ මාර්ගය කරා සුදුසු ධාවන තීරුවෙහි ඉදිරියට ගමන් කරන්න.